Islamabad Capital Territory

اسلام آباد | ری نیوز پاکستان
سینیٹ کی قائمہ کمیٹی برائے ہاؤسنگ اینڈ ورکس نے فیڈرل گورنمنٹ ایمپلائز ہاؤسنگ اتھارٹی (ایف جی ای ایچ اے) کو ہدایت کی ہے کہ زیرِ تکمیل ہاؤسنگ سکیمیں مکمل ہونے تک کوئی نیا منصوبہ شروع نہ کیا جائے۔
یہ فیصلہ اتھارٹی کے مختلف منصوبوں میں طویل تاخیر اور ہزاروں الاٹیوں، بالخصوص ریٹائرڈ سرکاری ملازمین، کو درپیش مشکلات کے تناظر میں کیا گیا ہے۔
سینیٹر ناصر محمود کی زیرِ صدارت ہونے والے اجلاس میں کمیٹی کو بتایا گیا کہ وزارتِ ہاؤسنگ اینڈ ورکس نے ایف جی ای ایچ اے پر نئی سکیمیں شروع کرنے کی پابندی عائد کر دی ہے اور اتھارٹی کو پہلے جاری منصوبوں کی تکمیل پر توجہ دینے کی ہدایت کی گئی ہے۔
کمیٹی کے ارکان نے منصوبوں پر کام کی سست رفتاری پر شدید تحفظات کا اظہار کرتے ہوئے کہا کہ اتھارٹی کی کوئی بھی بڑی ہاؤسنگ سکیم مقررہ مدت کے اندر مکمل نہیں کی جا سکی۔
ارکان کا کہنا تھا کہ مسلسل تاخیر سے نہ صرف عوام کا اعتماد متاثر ہوا بلکہ پلاٹ مالکان کو مالی، قانونی اور انتظامی مشکلات کا بھی سامنا کرنا پڑا ہے۔
اجلاس میں بھارہ کہو گرین انکلیو ون منصوبے کی پیش رفت کا بھی جائزہ لیا گیا۔ یہ منصوبہ 2009 میں شروع کیا گیا تھا، تاہم حکام کے مطابق 17 سال سے زائد عرصہ گزرنے کے باوجود صرف 52 فیصد ترقیاتی کام مکمل ہو سکا ہے۔
وزارتِ ہاؤسنگ اور ایف جی ای ایچ اے کے حکام نے کمیٹی کو بتایا کہ منصوبے میں تاخیر کی متعدد وجوہات ہیں، جن میں عدالتی مقدمات، قومی احتساب بیورو کی تحقیقات، زمین کے حصول اور ملکیت کے تنازعات، بینک گارنٹی سے متعلق مسائل، معاہداتی پیچیدگیاں اور کورونا وبا کے بعد تعمیراتی اخراجات میں نمایاں اضافہ شامل ہیں۔
حکام کے مطابق منصوبے پر ترقیاتی کام دوبارہ شروع کر دیا گیا ہے، جبکہ کئی زیرِ التوا معاملات فیصلے کے لیے ایف جی ای ایچ اے بورڈ کے سامنے پیش کیے جائیں گے۔
گرین انکلیو ون کے الاٹیوں کے نمائندوں نے بھی کمیٹی کے سامنے اپنے تحفظات پیش کیے۔ انہوں نے کہا کہ غیر معمولی تاخیر، بڑھتے اخراجات اور پلاٹوں کا قبضہ نہ ملنے کے باعث سرمایہ کاروں اور الاٹیوں کو شدید مشکلات کا سامنا ہے۔
کمیٹی کے چیئرمین سینیٹر ناصر محمود نے سوال اٹھایا کہ کئی برسوں کی تاخیر اور ناقص پیش رفت کے باوجود موجودہ معاہداتی انتظامات کیوں جاری رکھے گئے۔
انہوں نے کہا کہ ہزاروں شہری، خصوصاً ریٹائرڈ سرکاری ملازمین، اپنی عمر بھر کی جمع پونجی ان منصوبوں میں لگا چکے ہیں اور انہیں بروقت پلاٹوں کی فراہمی اور منصوبوں کی تکمیل کا حق حاصل ہے۔
قائمہ کمیٹی نے منصوبے کے ٹھیکیدار ڈاکٹر حفیظ عباسی کو آئندہ اجلاس میں طلب کرنے کی ہدایت کی ہے تاکہ وہ تاخیر کی وجوہات اور منصوبے کی تکمیل کے لائحہ عمل سے متعلق وضاحت پیش کریں۔
کمیٹی نے ایف جی ای ایچ اے انتظامیہ، ٹھیکیدار اور دیگر متعلقہ فریقوں کو باہمی تعاون کے ذریعے تمام زیرِ التوا مسائل فوری حل کرنے اور طویل عرصے سے تاخیر کا شکار منصوبے کو جلد از جلد مکمل کرنے کی بھی ہدایت کی۔

اسلام آباد | ری نیوز پاکستان
فیصل آباد الیکٹرک سپلائی کمپنی (فیسکو) , گوجرانوالہ الیکٹرک سپلائی کمپنی (گیپکو) اور آئیسکو اسلام آباد الیکٹرک سپلائی کمپنی (آ ئیسکو) کی نجکاری کے حکومتی منصوبے کو ممکنہ سرمایہ کاروں کے اہم تحفظات کا سامنا ہے، جس کے باعث حکومت کو سرمایہ کاروں کو اضافی یقین دہانیاں اور وضاحتیں دینا پڑ رہی ہیں۔

ذرائع کے مطابق سرمایہ کاروں نے بجلی کے نرخ مقرر کرنے کے طریقہ کار، نیپرا کے ریگولیٹری اختیارات، نجکاری کے بعد حکومتی مداخلت، پالیسیوں کے تسلسل، خود بجلی پیدا کرنے کی اجازت، اور کمپنیوں کے انتظامی اختیارات سے متعلق تفصیلی سوالات اٹھائے ہیں۔ ان کا مؤقف ہے کہ واضح اور مستحکم قواعد کے بغیر اربوں روپے کی سرمایہ کاری ممکن نہیں۔
حکومت نے ان تینوں ڈسکوز میں 51 سے 100 فیصد تک حصص اور انتظامی کنٹرول نجی شعبے کے حوالے کرنے کی پیشکش کی ہے۔ یہ تینوں کمپنیاں پنجاب اور اسلام آباد کے بڑے صنعتی، تجارتی اور شہری علاقوں میں 1 کروڑ 40 لاکھ سے زائد صارفین کو بجلی فراہم کرتی ہیں، جس کی وجہ سے انہیں پاکستان کی نسبتاً بہتر کارکردگی دکھانے والی تقسیم کار کمپنیوں میں شمار کیا جاتا ہے۔
نجکاری کمیشن نے سرمایہ کاروں کو راغب کرنے کے لیے ترکی، سعودی عرب، چین اور پاکستان کے مختلف شہروں میں روڈ شوز منعقد کیے۔ ان سرگرمیوں کے دوران 30 سے زائد مقامی کاروباری گروپس اور 23 بین الاقوامی سرمایہ کاروں سے ملاقاتیں ہوئیں جبکہ صرف ترکی میں 11 بڑے کاروباری گروپس کے ساتھ الگ الگ پریزنٹیشنز بھی دی گئیں۔
حکومت نے دلچسپی رکھنے والے سرمایہ کاروں کی درخواست پر فیسکو اور گیپکو کے لیے اظہارِ دلچسپی (EOI) جمع کرانے کی آخری تاریخ میں بھی توسیع کی، تاکہ سرمایہ کار اپنی اندرونی جانچ اور مالی جائزہ مکمل کر سکیں۔
نجکاری کمیشن نے اب تک دلچسپی ظاہر کرنے والے سرمایہ کاروں یا کمپنیوں کے نام سرکاری طور پر جاری نہیں کیے۔ حکام صرف یہ بتا رہے ہیں کہ مقامی کاروباری گروپس اور بین الاقوامی سرمایہ کار ترکی، سعودی عرب، چین اور دیگر ممالک سے تعلق رکھتے ہیں۔

اسلام آباد| ری نیوز پاکستان
حکومت نے رئیل اسٹیٹ سیکٹر کی بحالی اور سرمایہ کاری میں اضافے کیلئے ایک جامع خصوصی پیکیج تیار کر لیا ہے، جسے آئندہ ماہ متعارف کرائے جانے کا امکان ہے۔ ذرائع کے مطابق اس پیکیج کا مقصد سمندر پار پاکستانیوں اور غیر ملکی سرمایہ کاروں کو پاکستان میں سرمایہ کاری کی طرف راغب کرنا ہے، خاص طور پر موجودہ علاقائی صورتحال کے تناظر میں۔ مجوزہ پیکیج کے تحت اوورسیز پاکستانیوں کو نمایاں سہولتیں دینے کی تجویز دی گئی ہے، جن میں پراپرٹی کی خریداری پر فیڈرل ایکسائز ڈیوٹی کا خاتمہ اور ٹیکس چھوٹ شامل ہے۔ اس کے علاوہ فائلر کو مزید ریلیف دینے جبکہ نان فائلز کیلئے سختی برقرار رکھنے کا عندیہ دیا گیا ہے۔
حکومت نے ہاؤسنگ سیکٹر کو سہارا دینے کیلئے ایک کروڑ روپے تک کی ہوم فنانسنگ پر 5 فیصد فکسڈ مارک اپ متعارف کرانے کی بھی تجویز دی ہے، جس سے متوسط طبقے کو گھر کی خریداری میں آسانی ملنے کی توقع ہے۔
پیکیج میں جدید مالیاتی نظام متعارف کرانے پر بھی زور دیا گیا ہے، جس کے تحت ایسکرو اکاؤنٹس قائم کیے جائیں گے تاکہ خریدار اور فروخت کنندہ کے درمیان لین دین کو محفوظ اور شفاف بنایا جا سکے۔ اس نظام کے ذریعے ادائیگی اس وقت تک روکی جائے گی جب تک دونوں فریق اپنی ذمہ داریاں مکمل نہ کر لیں۔
مزید برآں، رئیل اسٹیٹ مارکیٹ کو منظم کرنے کیلئے خلیجی ممالک کی طرز پر ایسا ماڈل اپنانے کی تجویز بھی زیر غور ہے، جس کے تحت ڈویلپرز اور ایجنٹس کی رجسٹریشن، منصوبوں کی بروقت تکمیل اور خریداروں کے حقوق کا تحفظ یقینی بنایا جائے گا۔
ذرائع کے مطابق حکومت سپیشل انویسٹمنٹ زونز اور رئیل اسٹیٹ انویسٹمنٹ ٹرسٹس کے قیام پر بھی غور کر رہی ہے تاکہ ڈالر میں سرمایہ کاری کو فروغ دیا جا سکے۔ پیکیج کی حتمی منظوری کے لیے تجاویز متعلقہ اداروں کو ارسال کر دی گئی ہیں، جبکہ امکان ہے کہ آئندہ بجٹ میں بھی اس شعبے کیلئے مزید اقدامات متعارف کرائے جائیں گے۔