Lahore Division

لاہور | ری نیوز پاکستان
پنجاب حکومت نے رئیل اسٹیٹ سیکٹر کی بحالی اور پراپرٹی رجسٹریشن کے عمل کو آسان بنانے کے لیے اسٹامپ ڈیوٹی میں بڑی چھوٹ کا اعلان کیا ہے۔ اس اقدام کا مقصد مارکیٹ میں روانی پیدا کرنا، خریداروں اور فروخت کنندگان کو مالی ریلیف دینا اور پراپرٹی کی قانونی رجسٹریشن کو فروغ دینا ہے۔ حکام کا کہنا ہے کہ یہ اقدام پراپرٹی کے قانونی اور شفاف لین دین کو فروغ دینے کے لیے بھی نہایت اہمیت کا حامل ہے۔
نئے قانون کے تحت، کوآپریٹو ہاؤسنگ سوسائٹیز کے اصل الاٹی مکمل طور پر اسٹامپ ڈیوٹی سے مستثنیٰ ہوں گے، جبکہ دیگر خریداروں کو محدود مدت میں رعایتی شرحوں پر پراپرٹی رجسٹریشن کی سہولت دی جائے گی۔ رعایتی شرحیں درج ذیل ہیں:
• 31 جنوری 2026 تک رجسٹریشن پر 1% اسٹامپ ڈیوٹی
• 28 فروری 2026 تک رجسٹریشن پر 2% اسٹامپ ڈیوٹی
• 31 مارچ 2026 تک رجسٹریشن پر 3% اسٹامپ ڈیوٹی
اسسٹنٹ کمشنر اور ریونیو دفاتر کو ہدایت دی گئی ہے کہ نئے نرخوں کے تحت پراپرٹی رجسٹریشن میں سہولت فراہم کریں اور شہریوں کو آگاہی دیں تاکہ زیادہ سے زیادہ لوگ اس رعایت سے مستفید ہو سکیں۔ حکام نے مزید کہا کہ اس اقدام سے نہ صرف پراپرٹی مارکیٹ میں سرمایہ کاری بڑھے گی بلکہ قانونی اور شفاف رجسٹریشن کو بھی فروغ ملے گا، جو خریداروں کے حقوق کے تحفظ میں مددگار ثابت ہوگا۔
یہ اعلان ایسے وقت میں کیا گیا ہے جب ملک بھر میں رئیل اسٹیٹ سیکٹر میں سست روی دیکھی جا رہی تھی اور خریداروں کی دلچسپی میں کمی واقع ہوئی تھی۔ ماہرین کا کہنا ہے کہ یہ قدم مارکیٹ کے لیے ایک مثبت اشارہ ہے اور سرمایہ کاروں کے اعتماد کو بحال کرنے میں مددگار ہوگا۔
علاوہ ازیں، حکومت نے شہریوں سے اپیل کی ہے کہ وہ پراپرٹی کے قانونی اور شفاف لین دین کو ترجیح دیں تاکہ مستقبل میں کسی قسم کے تنازع سے بچا جا سکے۔ یہ چھوٹ محدود مدت کے لیے ہے، اس لیے خریداروں اور فروخت کنندگان کو فوری رجسٹریشن کے لیے اقدامات کرنے کی ترغیب دی گئی ہے۔

لاہور | ری نیوز پاکستان
وزیراعلیٰ پنجاب مریم نواز شریف نے ماہِ رمضان المبارک کے دوران صوبے بھر میں کاروباری سرگرمیوں کو چوبیس گھنٹے جاری رکھنے کی اجازت دے دی ہے، جس کے تحت بازاروں، کمرشل مراکز، بیکریز، ہوٹلز اور دیگر کاروباری مقامات بغیر وقت کی پابندی کے کھلے رہ سکیں گے۔ اس اقدام کا مقصد شہری سہولت کو بہتر بنانا اور بڑے تجارتی علاقوں میں معاشی کارکردگی کو یقینی بنانا ہے۔
سرکاری اعلامیے کے مطابق اس فیصلے کے ساتھ مستحق خاندانوں کو وفاقی اور صوبائی حکومت کے فلاحی اقدامات کے تحت مجموعی طور پر 23 ہزار روپے تک مالی معاونت فراہم کی جائے گی، تاکہ کم آمدن والے طبقات کو رمضان المبارک کے دوران بنیادی اخراجات میں سہولت حاصل ہو سکے۔
صوبائی حکومت کا کہنا ہے کہ کاروباری اوقات میں توسیع سے اہم شہری تجارتی مراکز کی کارکردگی کا دورانیہ بڑھے گا، جس سے معاشی سرگرمیوں کا تسلسل برقرار رہے گا اور شہری سطح پر تجارتی نظم و نسق مزید مستحکم ہوگا۔ اس اقدام سے مرکزی کاروباری شاہراہوں اور کمرشل زونز میں خریداروں کی آمد میں اضافہ متوقع ہے، جس سے مجموعی معاشی سرگرمی کو تقویت ملے گی۔
ماہرین کے مطابق توسیعی کاروباری پالیسی شہری معاشی ڈھانچے کے استحکام، کاروباری اعتماد کے فروغ اور بڑے تجارتی مراکز کی فعال حیثیت کو برقرار رکھنے میں معاون ثابت ہو سکتی ہے، خصوصاً ایسے اوقات میں جب صارفین کی طلب میں نمایاں اضافہ ہوتا ہے۔

لاہور: حسنین اولکھ، نمائندہ خصوصی | ری نیوز پاکستان
جھنگ دورے کے دوران سیکرٹری ہاؤسنگ کو بریفنگ میں 5 ڈسپوزل اسٹیشنز کی از سر نو تعمیر، 157 کلومیٹر طویل سوریج پر جاری کام اور 4 کلومیٹر طویل رین واٹر ڈرینیج سسٹم پر بھی بریف کیا گیا۔ سیکرٹری ہاؤسنگ نے ہدایت کیں کہ جلد از جلد تمام اسکیموں کو مکمل کیا جائے اور گلیوں و سڑکوں کو ڈسٹ فری طرز پر خوبصورتی سے بنایا جائے۔
نور الامین مینگل نے جاری ترقیاتی کاموں میں بہترین میٹریل کا استعمال اور تعمیراتی سائٹس پر عملے اور شہریوں کی حفاظت کے اقدامات یقینی بنائے کی ہدایات بھی جاری کیں۔ سیکرٹری ہاؤسنگ نے گفتگو کرتے ہوئے کہا وزیر اعلیٰ پنجاب کی ہدایت پر جاری ترقیاتی کاموں کا خود دورہ کر رہا ہوں۔ مینگل نے کہا تمام اضلاع میں سیوریج درستگی کے بڑے منصوبے متعارف کروا دیے گئے ہیں، ڈپٹی کمشنر جھنگ علی اکبر بھنڈر بھی دورے کے دوران ان کے ہمراہ تھے۔